ෆින්ලන්තය යනු දරුවෙකු ඇති දැඩි කිරීමට ලොව ඇති හොඳම ස්ථානයක් වන්නේ ඇයි ? - Why Finland Feels Like the Best Place to Raise a Child

අද මට ෆින්ලන්තය රටක් විදිහට තම දරුවන් රැකබලා ගන්නා ආකාරය ගැන දිනපොතේ ලිව්වොත් හොඳයි කියලා සිතිවිල්ලක් ආවා.ෆින්ලන්තය කියන්නේ සැබවින්ම ලෝකයේ වඩාත්ම ළමා හිතකාමී රටවලින් එකක්.මෙහිදී දරුවෙකුගේ ළමා කාලයේ සෑම අදියරකටම සහයෝගය සහ ආරක්ෂාව ලැබෙනවා.ළදරුවෙකු අපේක්ෂා කරන මොහොතේ සිට, රටේ මුළු පද්ධතියම දරුවා උපදින පවුලට මෙන්ම උපදින දරුවාටද ශරීරයේ පහසුව මෙන්ම මනසේ සාමය ලබා දීම සඳහා ගොඩනගා තිබෙනවා.

ෆින්ලන්තය තුල ළදරුවෙකු ඉපදීමට පෙර පවා සෞඛ්‍ය සේවා දැරිය හැකි සහ ප්‍රවේශ විය හැකි මිලකට ලැබෙනවා.ගැබිනි මව්වරුන්ට වෙනත් බොහෝ බටහිර රටවල දක්නට ලැබෙන අධික වියදම් නොමැතිව නිතිපතා පරීක්ෂා කිරීම්, උපදෙස් සහ රැකවරණය ලබාගත හැකිවාක් මෙන්ම දරු ප්‍රසූතියට කාලය පැමිණි විට, පවුල්වලට කම්පන සහගත අධික මිල රැගත් රෝහල් බිල්පත් වලට මුහුණ දීමට සිදු වන්නේ නැහැ.

දරු ප්‍රසූතිය සහ රෝහල් ගතවීම් සඳහා සෞඛ්‍ය පද්ධතියෙන් හොඳ සහයෝගයක් ලැබෙන අතර, ඒ නිසාම දෙමාපියන්ට මුදල් ගැන කරදර වීම වෙනුවට තම නව දරුවා පිළිගැනීම කෙරෙහි අවධානය යොමු කළ හැකියි.උපතින් පසු, පසු විපරම් සත්කාර සහ නිතිපතා අවශ්‍ය එන්නත් වැනි ළමා සෞඛ්‍ය වාර්තාවන් දිගටම කරගෙන යන අතර, මව සහ දරුවා යන දෙදෙනාම ආරක්ෂිතව සහ සෞඛ්‍ය සම්පන්නව වෙසෙන බවට වග බලා ගන්නවා.

ෆින්ලන්තයේ කලක පටන් පවත්වාගෙන එන වඩාත්ම අද්විතීය සම්ප්‍රදායන්ගෙන් එකක් වන්නේ ළදරු පෙට්ටියයි ( Baby Box ).සෑම පවුලකටම ළදරු ඇඳුම්, ඇඳ ඇතිරිලි සහ අලුත උපදින දරුවාගේ ජීවිතයට අවශ්‍ය කුඩා දේවල් වලින් පිරුණු මෙම පැකේජය නොමිලේම ලැබෙනවා.පෙට්ටිය කුඩා මෙට්ටයක් සමඟ පවා එන අතර බොහෝ ළදරුවන් ඔවුන්ගේ පළමු ඇඳ ලෙස ඒ අලංකෘත කාඩ්බෝඩ් පෙට්ටිය තුල නිදා ගන්නවා.මෙම සුන්දර සම්ප්‍රදාය මඟින් සෑම දරුවෙකුටම, ඔවුන්ගේ පවුලේ පසුබිම කුමක් වුවත්, මූලික අවශ්‍යතා සපුරාලමින් ජීවිතය ආරම්භ කරන බව සහතික කර තිබෙනවා.

දෙමාපියන්ට ද එම මුල් මාස දරුවා සමඟ වෙසෙමින් භුක්ති විඳීමට රැකියාවන්ගෙන් නිවාඩු කාලය ලබා දෙනවා.ෆින්ලන්තය මව්වරුන්ට සහ පියවරුන්ට යන දෙදෙනාටම බෙදා ගත හැකි ත්‍යාගශීලී දෙමාපිය නිවාඩු විශාල ප්‍රමාණයක් ලබා දී එමගින් මවට සුවය ලබා ගැනීමට උපකාර කිරීම පමණක් නොව, පියවරුන්ට තම දරුවන් සමඟ බැඳීමට අවස්ථාවක් ලබා දීම ද සිදුකරනවා.දෙමාපියන්ට ඔවුන්ට වඩාත් ගැලපෙන ආකාරයෙන් නිවාඩු බෙදා ගත හැකි අතර, දරුවා ඇතිදැඩි කිරීම දෙමාපියන්ගේ හවුල් වගකීමක් බව එමගින් ප්‍රායෝගිකව පෙන්වා දී තිබෙනවා.

දරුවන් වැඩෙන විට ඇවැසි පවුල්වලට රජයේ මූල්‍ය සහයෝගය දිගටම පවතිනවා.අයදුම්කල විට සෑම දරුවෙකු වෙනුවෙන්ම පවුල්වලට මාසික ළමා දීමනාවක් ලැබෙන අතර, සෑම නව දරුවෙකු සමඟම එම මුදල වැඩිවන ආකාරයට සකසා තිබෙනවා.මෙය දෙමාපියන්ගේ දෛනික ජීවිතය පහසු කරනවා මෙන්ම පවුලක් ඇති දැඩි කිරීමේ අධික වියදම් පියවා ගැනීමට දෙමාපියන්ට උපකාරයක්ද වනවා.මෙම කර්තව්‍ය සමාජය දරුවා ඇතිදැඩි කරන ඔවුන්ගේ ගමනේදී දෙමාපියන් සමඟ සිටින බව මතක් කිරීමක් වනවා.

දිවා සුරැකුම දරුවන් වෙනුවෙන් ගොඩනංවා ඇති තවත් ශක්තිමත් කුළුණක් වනවා.ෆින්ලන්තයේ, සෑම දරුවෙකුටම දිවා සුරැකුම් සඳහා අයිතියක් ඇති අතර, එහි වියදම පවුලේ ආදායම මත රඳා පවතිනවා.අඩු ආදායම්ලාභී පවුල් සඳහා, දිවා සුරැකුම නොමිලේ විය හැකි අතර, ආදායම් වැඩි පවුලකට වුවද එය දැරිය හැකි මිලකට ලබාදෙනවා.මෙය උසස් තත්ත්වයේ මුල් ළමාවිය අධ්‍යාපනය සෑම දරුවෙකුටම ප්‍රවේශ විය හැකි බවට සහතික කිරීමක් වන අතර තම දරුවන් ආරක්ෂිතව රැකබලා ගන්නා බව දැන දෙමාපියන්ට හිත නිදහසේ තම රාජකාරි වැඩ කිරීමට හෝ ඉගෙනීමට නිදහස ලබා දෙනවා.

ෆින්ලන්ත අධ්‍යාපනය යනු ෆින්ලන්තයේ දරුවන්ට ලබා දෙන ලොව පුරා වඩාත්ම ප්‍රසිද්ධ තෑග්ග විය හැකියැයි මට සිතෙනවා.එය ලඳරු පාසලේ සිට විශ්ව විද්‍යාලය දක්වා නොමිලේ ලබාදෙන අතර කිසිම දරුවෙකු මග නොහැරෙන බවට වග බලා ගනිමින් දරුවන්ට නොමිලේ පාසලේදී ආහාර, පෙළපොත් සහ අවශ්‍ය අනෙකුත් ද්‍රව්‍ය ලැබෙනවා.ෆින්ලන්ත පාසල් ඔවුන්ගේ ආතතියෙන් තොර අධ්‍යාපන ප්‍රවේශය සඳහා ප්‍රසිද්ධයි.

සියළුම දරුවන් තම නිවෙසට ලඟම පාසලට පාගමනින් හෝ පාපැදියෙන් තනිවම හෝ මිතුරන් සමග යන්නේ සෑම පාසලකම අධ්‍යාපනය එක හා සමාන බැවින්.කෙටි නිවාඩු වගේම දිගු ගිම්හාන නිවාඩු සහ හැකි සෑම විටම ක්‍රීඩා සහ පරිසරය ගවේෂණය තුළින් ඉගෙනීම කෙරෙහි දරුවන්ගේ අවධානය යොමු කිරීමේ ඉලක්කය වන්නේ නිමක් නැති විභාග සඳහා දරුවන් තල්ලු කිරීම නොව කුතුහලයෙන් හා නිර්මාණශීලී මනසක් ඇති කිරීම මගින් ඉගෙනගැනීමට මග පාදා දීමයි.

ෆින්ලන්තයේ එදිනෙදා ජීවිතයේදී දරුවන්ගේ අයිතිවාසිකම්වලට මහත් සේ ගරු කරනු ලබනවා.ශාරීරික දඬුවම් තහනම් කර ඇති අතර, දෙමාපියන්ට පවා තම දරුවන්ට එලෙස දඬුවම් කිරීමට නීතිය ඉඩ දෙන්නේ නැහැ.දරුවෙකුගේ යහපැවැත්ම අවදානමට ලක්ව ඇත්නම්, බලධාරීන් වහා මැදිහත් වනවා.මෙය දරුවන් තමන්ගේම හඬක් සහ අයිතිවාසිකම් ඇති පුද්ගලයින් ලෙස සලකන සංස්කෘතියක් නිර්මාණය කර තිබෙනවා.

පාසලෙන් පිටත, ෆින්ලන්ත නගර සහ ගම්මාන සියල්ලම පාහේ දරුවන් සඳහා උචිත අවස්ථා වලින් පිරී තිබෙනවා.සෑම තැනකම පුස්තකාල, ක්‍රීඩා පිටි, ක්‍රීඩා පහසුකම් සහ සංස්කෘතික ක්‍රියාකාරකම් පිහිටුවා ඇත්‍තේ දරුවන්ට ඔවුන් වෙනුවෙන්ම නිර්මාණය කර ඇති ආරක්ෂිත අවකාශයන්හි දුව පැන සෙල්ලම් කරමින් , පොතක් පතක් කියවමින් , නොයෙකුත් නිර්මාණ කරමින් සහ නව දේවල් සොයා ගත හැකි ආකාරයෙන් ඔවුන්ගේ ජීවිතය හැකියාවන්ගෙන් පොහොසත් කරමිනුයි.

මේ සියල්ල එකට බැඳ තබන්නේ ෆින්ලන්තයේ ළමා රැකවරණයේ සහ සුබසාදනයේ සංකල්පීය වෙනසයි.ගැබ්ගැනීමේ සිට දරුවෙකු වැඩිහිටිභාවයට පත්වනතෙක් පවුල්වලට සහාය වන අතරම දරුවාගේ ළමා කාලය ආරක්ෂිත හා ප්‍රීතිමත් එකක් කිරීමට සෞඛ්‍ය සේවා, අධ්‍යාපනය, මූල්‍ය ආධාර සහ ප්‍රජා ක්‍රියාකාරකම් සියල්ලම එකට අත්වැල් බැඳගෙන ක්‍රියා කරනවා.දෙමාපියන් බොහෝ විට වෛද්‍ය බිල්පත්, දිවා සුරැකුම් වියදම් , පාසැල් හෝ විශ්ව විද්‍යාල ගාස්තු ගැන කරදර වන වෙනත් බොහෝ බටහිර රටවල් හා සසඳන විට, ෆින්ලන්තය දරුවන්ට සැබවින්ම නිදහස් ස්ථානයක් ලෙස හැඟෙනවා.

මම මේ ගැන ලියන අතරතුරත් ෆින්ලන්තයේ ක්‍රීඩා පිටිවල සිනහවෙන් පිරි , පුස්තකාලවල නිහඬ ප්‍රීතිය අත්විඳිමින් සහ පාසලේදී පීඩනයකින් තොරව ඉගෙන ගන්නා දරුවන්ගෙන් පිරුණු පන්ති කාමර මට සිතේ මැවෙනවා.මේ සියල්ලෙන්ම එක් කරුණක් නම් පැහැදිලි වනවා. එනම් ෆින්ලන්තය දරුවන් සඳහා මේ කරන සුබසාදනය, එය රටක් ලෙසට තම අනාගතය සඳහා සිදුකරන හොඳම ආයෝජනයයි.දින සටහන නිමාකරන මේ මොහොතේත් ෆින්ලන්තය සෑම දරුවෙකුම තම නිධානයක් ලෙස සලකන රටක් වීම ගැන මම අතිශය කෘතඥ වෙනවා.

Kiitos ☺